پاکستان میں تیل کے بحران کا خدشہ پیدا ہوگیا۔

آئل مارکیٹنگ کمپنیوں کی جانب سے اسٹاک اٹھانے سے انکار کے بعد ریفائنریز بند ہونے کے دہانے پر پہنچ گئیں، گندم کی کٹائی کے سیزن کے دوران ملک میں ہائی سپیڈ ڈیزل کی قلت کا خدشہ پیدا ہوگیا

اسلام آباد (تیز ترین)  پاکستان میں تیل کے بحران کا خدشہ پیدا ہوگیا ہے۔ تفصیلات کے مطابق گندم کی کٹائی کے موسم میں حکومت نے آئل اینڈ گیس ریگولیٹری اتھارٹی اوگرا سے تیل کی ان مارکیٹنگ کمپنیوں کے خلاف کارروائی کا مطالبہ کیا ہے، جو آئل ریفائنریز سے پٹرولیم مصنوعات کے سٹاک لینے سے گریزاں ہیں جس کے نتیجے میں پٹرولیم مصنوعات کی فراہمی میں شدید پریشانی کا سامنا ہے۔ میڈیا رپورٹ کے مطابق ملک میں 80 سے زیادہ او ایم سیز کام کررہے ہیں۔ لیکن سست فروخت اور کم قیمتوں کے پیش نظر انوینٹری نقصانات سے بچنے کے لیے ان میں سے کوئی بھی اپنا لازمی ذخیرہ برقرار نہیں رکھ رہا۔ آئل مارکیٹنگ کمپنیوں کی جانب سے اسٹاک اٹھانے سے انکار کے بعد ریفائنریز بند ہونے کے دہانے پر پہنچ گئی ہیں، جس کے بعد گندم کی کٹائی کے دنوں کے دنوں میں ہائی سپیڈ ڈیزل کی قلت کا خدشہ پیدا ہوگیا ہے۔ جس کی وجہ سے پاکستان اسٹیٹ آئل پر دباؤ بڑھتا جارہا ہے، اور کمپنی کیلئے ملک بھر میں مختلف مقامات پر اپنے لازمی اسٹاک کو برقرار رکھنا بھی مشکل ہو رہا ہے۔ دوسری جانب چھوٹے او ایم سی کی صورت حال دیہی علاقوں میں زیادہ واضح ہے، جہاں تیارگندم کی کٹائی عروج میں داخل ہوچکی ہے۔ عہدیداروں نے کہا کہ مذکورہ حالات میں کسانوں کے لیے نقل و حمل اور گوداموں تک براہ راست رسائی مشکل ہورہی ہے، اس کے نتیجے میں مڈل مین کسانوں سے تیار کردہ گندم حکومت کے مقرر کردہ قیمتوں سے کم قیمت پر خریدتے ہیں۔حکومت نے اوگرا سے کہا کہ وہ اپنے اختیارات استعمال کرے اور تمام او ایم سی سے اسٹاک کی لازمی شرائط عمل درآمد کراے۔ پیٹرولیم ڈویژن نے ریگولیٹرز کو ایک پالیسی نوٹ کے ذریعے آگاہ کیا تھا کہ ملک بھر میں لاک ڈاؤن کے باوجود یکم اپریل سے پٹرولیم مصنوعات کی زیادہ فروخت دیکھنے میں آئی ہے۔ پیٹرولیم ڈویژن نے ریگولیٹر کو مشورہ دیا کہ مذکورہ صورتحال کے پیش نظر آئندہ کٹائی کے سیزن کے دوران ملک میں ہائی سپیڈ ڈیزل کی شدید قلت کا امکان موجود ہے۔ انہوں نے کہا ہے کہ بدترین صورتحال سے بچنے کے لیے اوگرا کے ضابطہ کار سے درخواست کی گئی ہے کہ وہ او ایم سی کی کارکردگی کی نگرانی کریں، اور انہیں اپنے ذخائر میں 20 دن کا لازمی اسٹاک برقرار رکھنے کی ہدایت کریں۔

Facebook Comments

POST A COMMENT.