چینی سرمایہ کاری پاکستان کے مفاد میں نہیں۔ وزیر اعظم کے معاون خصوصی شہباز گل کا بیان

چین سے پیارہے لیکن بطور بزنس پروفیسر کہوں گا چینی سرمایہ کاری پاکستان کے مفاد میں نہیں۔ کیونکہ چین کا کلچر بالکل مختلف ہے۔ شہباز گل

لاہور ( تیز ترین ) وزیراعظم کے معاون خصوصی شہباز گل کا کہنا ہے کہ چینی سرمایہ کاری پاکستان کے مفاد میں نہیں ہے۔ چین سے پیارہے لیکن بطور بزنس پروفیسر میں کہوں گا چینی سرمایہ کاری پاکستان کے مفاد میں نہیں، کیونکہ چین کا کلچر بالکل مختلف ہے۔ انہوں نے ایک تقریب سے خطاب کرتے ہوئے کہا کہ اگر مجھے بطور بزنس پروفیسر پوچھا جائے کہ چین کی پاکستان میں سرمایہ کاری فائدہ مند ہے، تو میں کہوں گا کہ بالکل فائدہ مند نہیں ہے۔ کیونکہ چین اور پاکستان کا کلچر بالکل مختلف ہے۔ میں چین سے پیار کرتا ہوں۔ میں  چین کےخلاف نہیں ہوں، لیکن اس کے باوجود کہوں گا کہ چین اور پاکستان کا کلچر بہت زیادہ مختلف ہے۔

پاکستان مسلم لیگ (ن) کے سیکرٹری جنرل احسن اقبال نے ٹویٹر پر اپنے ردعمل میں کہا کہ وزیراعظم کے معاون خصوصی شہباز گل کے پاکستان کے دوست ملک چین کے خلاف بیان منظر عام پر آنے کے بعد ان سے فورا استعفیٰ لیا جائے۔ احسن اقبال نے کہا کہ حکومت کی آستینوں میں چین دشمن لوگ بیٹھے ہیں تو سی پیک  کیسے کامیاب ہو سکتا ہے۔ احسن اقبال نے شہباز گل کے بیان کی ویڈیو بھی شیئر کی۔ مزید برآں چینی بحران کی رپورٹ اور مافیا کےخلاف کاروائی کے حکومتی فیصلے پر احسن اقبال نے کہا کہ مسلم لیگ (ن) کے دور میں چینی کی قیمت مستحکم تھی۔ چینی کی قیمتیں بڑھنے کا ذمہ دار کون تھا یہ نہیں بتایا گیا۔ پی ٹی آئی دورمیں چینی قیمت بڑھی بتایا جائے کس کس نے فائدہ اٹھایا۔ احسن اقبال نے کہا کہ چینی بحران میں جس کے نام آئے ان کا نام ای سی ایل میں کیوں نہیں ڈالا گیا۔ انہوں نے کہا کہ حکومت اپنی چوری کو چھپانے کےلئے مسئلے کو کنفیوژ کررہی ہے۔ جب ملک میں چینی کی کمی تھی تب پی ٹی آئی حکومت نے اس کی برآمد کی اجازت دی۔ نیب جتنا آزاد ہے آج پاکستان کے ہر شہری کو پتہ ہے۔ عمران خان نیب کوہدایات دیتے ہیں تونیب اپوزیشن کےخلاف سرگرم ہوجاتا ہے۔ نیب کی آزادی کا سارا زوراپوزیشن پرچلتا ہے۔ انہوں نے کہا کہ حکومت پہلے ان چوروں کوپکڑے جنہوں نے چینی منہگی کی ہے۔