نیو اسلام آباد ایئرپورٹ کو طوفانی بارش کے باعث نقصان۔ چھتیں گر گئیں

ائر پورٹ کی کئی جگہوں پر چھتیں گر گئیں، شیشے کا گیٹ گر گیا اور کئی کھڑکیوں کو بھی نقصان پہنچا، بورڈنگ برج بھی متاثر، پارکنگ میں لگا موبائل ٹاور بھی زمین پر آگرا۔

اسلام آباد ( تیز ترین )  پاکستان کے جڑواں شہروں وفاقی دارالحکومت اور راولپنڈی میں گزشتہ شام کے وقت اچانک تیز ہواوں اور آندھی کے ساتھ طوفانی بارش ہوئی، جس کے بعد گرمی کا زور ٹوٹ گیا تاہم نیو اسلام آباد ایئرپورٹ بھی ٹوٹ پھوٹ کا شکار ہوگیا۔
تفصیلات کے مطابق منگل کو وفاقی دارالحکومت اسلام آباد میں شام کے وقت طوفانی بارش ہوئی، بارش کے علاوہ اسلام آباد میں آندھی طوفان بھی آیا۔ اس باعث کچھ برس قبل ہی تعمیر کئے گئے ملک کے سب سے بڑے نئے اسلام آباد ائیرپورٹ پر تباہی مچ گئی۔ طوفانی بارش اور آندھی طوفان نے اسلام آباد ائیرپورٹ کی مینٹیننس کے حوالے سے سول ایوی ایشن اتھارٹی کی کارکردگی پہ سوالیہ نشان لگا دیا۔ نیو اسلام آباد انٹرنیشنل ایئرپورٹ کو تیز ہواؤ، آندھی اور بارش سے شدید نقصان پہنچا۔ آندھی طوفان کے باعث کئی چھتیں زمین بوس ہوگئیں اور لاؤنج میں شیشے کا گیٹ بھی ٹوٹ کر گرگیا۔ کھڑکیاں بھی ٹوٹ پھوٹ کا شکار ہوگئیں۔ مسافروں کو جہاز تک پہنچانے والے بورڈنگ برج کو بھی شدید نقصان پہنچا ۔

Screenshot 1

بورڈنگ برج کی ٹین کی دیوار ایک طرف سے ٹوٹ گئی۔ مذکورہ برج بین الااقوامی پروازوں کےلیے استعمال ہوتا ہے۔ ایئرپورٹ کی پارکنگ میں لگا موبائل ٹاور بھی تیز ہواؤں کا زور برداشت نہ کرسکا اور زمین پر آگرا ۔ تاہم خوش قسمتی سے ائیرپورٹ پر اتنی تباہی  مچنے کے باوجود اس دوران کسی قسم کا کوئی جانی نقصان نہیں ہوا۔ اسلام آباد ائیرپورٹ پر اتنی تباہی مچنے کے بعد سوشل میڈیا پر لوگوں کی جانب سے شدید غم و غصے کا اظہار کیا گیا ہے۔ لوگوں کا کہنا ہے کہ اس ائیرپورٹ کو ملک کا سب سے جدید اور عالمی معیار کا ائیرپورٹ قرار دیا جاتا ہے، لیکن ایک بارش نے اس ائیرپورٹ کی دیکھ بھال کے حوالے برتی جانے والی غفلت کو بے نقاب کیا ہے۔ حکومت کو فوری اس معاملے پر توجہ دے کر ائیرپورٹ کی باقاعدہ دیکھ بھال یقینی بنانی چاہیے۔

Facebook Comments

POST A COMMENT.